Një mjet lundrues tip gomone është gjetur në brigjet e Vlorës pikërisht në vendin e quajtur “Delisuf”. Sipas njoftimit të Policisë, mjeti është rreth 7-8 metra i gjatë dhe me dy motora. Edhe pse nuk është konstatuar asnjë objekt i paligjshëm, policia po vijon hetimet për gjetjen e pronarëve.
Njoftimi:
Policia Kufitare Vlorë
Informacion paraprak
Më datë 10.01.2018, Salla Operative e Kufirit dhe Migracionit Vlorë ka marrë njoftim se në vendin e quajtur ”Delisuf”, ndodhet i qëndruar një mjet lundrues tip gomone.
Shërbimet e Policisë Kufitare organizuan menjëherë punën dhe shkuan për verifikim dhe kontroll pranë vendit në fjalë ku kanë konstatuar të qëndruar në breg të detit mjetin tip gomone rreth 7-8 m i gjatë me dy motorra.
Në mjetin lundrues nuk është konstatuar asnjë send apo objekt i kundërligjshëm.
Policia Kufitare Vlorë po punon në bashkëpunim me DVP.Vlorë, Delta Forcë dhe GdF për verifikimin dhe dokumentimin ligjor të rrethanave të ngjarjes nëse ka vepër penale ose jo si edhe për identifikimin e shtetasit/ve të cilëve u përket gomonia.
