Drejtoria rajonale e policisë së Kosovës në Pejë sot, gjysmë ore pas mesnatës, është njoftuar për të shtëna me armë zjarri në një pyll në afërsi të fshatit Kosuriq të Pejës.
Në njoftimin për media të policisë theksohet se në vendngjarje janë dërguar njësitë e policisë, të cilat kanë hasur në dy viktima, “që të dy vëllezër, të cilët ishin qëlluar me armë zjarri dhe si pasojë e të shtënave kishin ndërruar jetë në vendin e ngjarjes”.
Emrat e personave të vrarë, që janë shtetas shqiptarë të Kosovës, janë dhënë vetëm me inciale: R. B. dhe A. B. të moshës përkatësisht 28 dhe 31-vjeçare.
Në njoftim pastaj thuhet se hetuesit e Drejtorisë rajonale të policisë në Pejë kanë arrestuar tre të dyshuar për vrasje, të cilëve me vendim të prokurorit u është caktuar masa e ndalimit prej 48 orësh, për vazhdim të procedurës së mëtejshme ligjore. /REL
