Analisti Agron Gjekmarkaj me anë të një shkrimi në gazetën “Panorama” ka shkruajtur se ambicia më e madhe e kryeministrit Rama është të prezantohet, imponohet si një “Reformatori i madh”.
Gjekmarkaj thekson se në vendin tonë nuk ka një koncept më abstrakt sa ajo fjalë e përdëllyer që përdor ai, gati sa shprehjet “kthejmë dinjitetin dhe krenarinë” , “pa dyshim Shqipëria po rilind”, “policia që duam” e të tjera slogane kësodore!
Pavarësisht përpjekjeve të tija, perceptimi i shoqërisë për “reformat” është i keq.
“Zakonisht ajo “as nuk hahet e as nuk pihet”, por këqyret herë me dhimbje e herë me indiferencën tromakse të impotentit. Ato në përgjithësi konsiderohen si hile për të pushuar njerëz nga puna dhe për të punësuar partiakë, si mundësi për të kapur atë që deri dje nuk e kishe, qoftë institucion, territor apo sistem!”, shkruan Gjekmarkaj në Panorama.
Më poshtë, ai thekson se Bashkia Tiranë i ngjanë një salamandre, ku sipas një kirurgjie rilindase bashkohen copat e elektoratit socialist, duke zhvleftësuar edhe kontributin e LSI-së në zonë.
“Po kështu nga Shkumbini e poshtë, ku banon një e treta e popullsisë, grumbulloi nja 40 bashki, ndërsa në rrjedhën e sipërme, dikund njëzet e nëntë, duke shfaqur preferenca diskriminuese. Nëse kjo ndarje e re territoriale do të kishte funksionuar, mbase sot edhe kundërshtarët e djeshëm do të heshtnin”, shkruan Gjekmarkaj.
Ndër të tjera, analisti thekson se bash tek socialistët duke se fle ende Enver Hoxha.
“A thua nuk e dinë akademikët se frika është aleat i sundimit?! Pa harrur edhe vargun e Nolit “dhe Faiku faqe ndërron, dje shante, sot lëvdon” për ndokënd në pritje të ndonjë ylyfeje si skrop i ngrohtë për të rrasur mustaqet spic! Fobia ndaj gradave shkencore u shfaq edhe në dëbimin që Rama u bëri intelektualëve nga PS-ja e, mbi të gjitha, nga Qeveria që na prezantoi me bëmat e së cilës bashkëjetojmë”, shkruan ai.
Gjekmarkaj thekson se kjo që ndodh me nxënësit, të cilët kanë mbaruar maturën dhe duan të regjistrohen në Universitet, tregon vizionin e reformës së Edi Ramës për Arsimin, rrëmujën, dështimin dhe mediokritetin e saj si bazament mbi të cilin u konceptua.
“Po ashtu, një kujtesë kalimthi e meriton edhe “nëna e të gjitha betejave”, “reforma në drejtësi”! Ajo është më e lakuara në gojën e Kryeministrit”, shkruan ai në Panorama.
Sipas Gjekmarkajt këto janë reformat që “nuk janë bërë kurrë më parë” në vendin tonë, të gjitha meritë e “Reformatorit të madh”.
“Kush ka dilema për të keqen e vet, le të pyesë veç dy maturantë!”, mbyll shkrimin ai.
