Analisti Agron Gjekmarkaj me anë të një shkrimi në gazetën ‘Panorama’ ka zbardhur disa detaje në takimin e realizuar mes kreut të PD-së, Lulzim Basha me dhjetra intelektualë, artistë, dhe gazetarë në mjediset e një prej hoteleve më të njohur në vend.
Gjekmarkaj shkruan se takime të tilla gjatë dekadave të pluralizmit ka pasur, por risia qëndron tek kultura e kuvendimit dhe vërtetësia e tij, tek interesi real për të kuptuar se çfarë mendohet pikërisht për Lulzim Bashën dhe punën e tij në vetë të parë sy për sy.
Ndër të tjera, thekson se në atë takim, veç analistëve të njohur, aty u dallua prezenca e politikanëve të cilët kanë një histori eklipsi në PD dhe me PD-në, si Preç Zogaj, Besnik Mustafaj apo Selami Xhepa, si dhe shumë personalitete nga fusha të dijës dhe shkencës. Alfred Lelës me të drejtë i kishte rënë në sy mungesa e Mark Markut, si njëri prej mendimtarëve konsekuentë të së djathtës.
“Basha për gati 4 orë u përball me ato që nuk mund t’i dëgjojë kurrë në strukturat apo forumet e partisë së vet, pikërisht prej atij mentaliteti të ulur këmbëturqisht mes nesh në mënyrë trasverale mbi partitë tona, që promovon lajkat dhe dekurajon kritikat, që përkëdhel servilët dhe sheh vëngër çdo turbullues ujërash, që shërbehet nga mediokërit dhe trazohet nga të diturit, dhe ky fakt i bën nder si shenjë force dhe jo dobësie”.
Sipas tij, metafora është e qartë. Nuk duam një Zot të rremë që i di të gjitha dhe na imponon vullnetin e tij, por një krijesë të Hyut të vërtetë, që e ka ‘frikë’ atë dhe ligjet që miratojmë së bashku, një politikan që mund t’i besojmë me votë dhe mund ta rrëzojmë po më votë, pa frikën se vota jonë blihet, shitet, kërcënohet apo çmendet nga droga. Për kaq pak dhe kaq shumë njëkohësisht, Basha jep garanci për t’i besuar së paku njëherë.
