Këtë enjte Lulëzim Basha pas shumë kohësh vendosi që të dalë përball gazetarëve për të folur për situatën politike dhe qëndrimet e tij.
Qëndrimet Bashës janë komentuar nga deputeti i PD, që mban postin e nënkryetarit të Kuvendit, Agron Gjekmarkaj, i cili shpesh në shkrimet që poston në rrjetet sociale ironizon kolegët e tij demokratë dhe kundërshtarët politik.
Këtë herë në fokus të shkrimit të tij ishte Lulzim Basha. Gjekmarkaj thotë se Basha e ka argëtuar shumë, ndërsa shprehet se bën për pjekje të kota për “të qenë dikush pasi gjithmonë ka qenë askush”.
“Një konferencë shtypi me një protagonist që për një çast na shkëputi nga realiteti. Na argëtoi qerratai. Na kishte marrë malli. E kërkonim në emisionet televizive për njerëzit e humbur dhe ja ku u shfaq. Qeshte, bënte grimasa, mërzitej, qeshte prapë. Nuk thoshte asgjë në rastin me të mirë, nuk dinte çfarë thoshte shpesh. Të gjallët i vdiq, të vdekurit i ktheu përmbys. Të dhimbsej në vetëposhtërimin e tij si shërbëtor i marrë peng nga ambicia e tij për të mbetur dikush kur gjithmonë ka qenë askush. Shaka e fatit qe kërkon reflektim të thellë që lideri nuk klonohet, nuk rritet ne epruvete nuk zgjidhet për mungesën e cilësive! E kundërta do na e kishte shmangur këtë keqardhje për një investim të rreme që kemi bërë në shumë vite. I la të zhgënjyer të gjithë! Ata që po e përdorin për cilësinë e ulet të aktrimit po kaq ata që prisnin një vrasje ndërgjegjeje apo pak ndjenjë turpi për kohën, mundin sakrificat, shpresat që ju vrau me kotësinë e tij gjenetike! Një gjë ra ne sy që nuk kishte ndryshuar paaftësia për t’u skuqur apo zverdhur!”, shprehet Gjekmarkaj.
