Instituti i Gjeoshkencave, Energjisë, Ujit dhe Mjedisit (IGJEUM) bën me dije se gjatë 24 orëve të ardhshme disa qarqe të vendit rrezikohen nga zjarret.
Sipas IGJEUM qarqet që rrezikohen nga zjarri janë Fieri, Durrësi dhe Lezha si dhe pjesët kufitare të Shkodrës. Ndërkohë në qarqet Gjirokastër dhe Korçë priten reshje shiu gjatë ditës së nesërme.
Sot pasdite (e diel, dt.30) dhe nesër (e hënë, dt.01) pritet nivel “I LARTË” rreziku në qarkun Fier.
Kështu pritet të jenë edhe qarqet Lezhë dhe Durrës.
Pjesët kufitare ndërmjet qarkut Shkodër dhe qarkut Lezhë dhe pjesa qendrore e qarkut Kukës me shtrirje deri në kufi me qarkun Shkodër do të vazhdojnë të mbeten në vlera të larta rreziku.
Qarqet me dalje në bregdet do të vazhdojnë të jenë veçanërisht të rrezikuar në pjesën perëndimore të tyre.
Pjesa tjetër e Shqipërisë mbetet në nivel “i moderuar”, por relativisht me intensitet më të ulët krahasimisht me ditët e kaluara.
