“Nëse nuk veprohet për ta ndaluar shkatërrimin që po i kanoset, Thethi, fshati turistik mes Alpeve nuk do të ekzistojë më”. Kështu shprehen banorët e zonës të cilët janë revoltuar pas vendimit të qeverisë për të rinovuar kontratën me koncensionarin “Shala Energy”. Banorë, por edhe turistë janë duke mbledhur firmat për peticion. Ata kërkojnë anulimin e koncensionit të HEC-ve mbi lumin e Shallës. “Nuk do të lejojmë ndërtimin e HEC-ve. Ne jemi të mbaruar pa turizmin”, tha kryeplaku Marash Rrgalla. Ndërsa administratorja e një prej vilave në Theth, Aida Gjecaj u bëri thirrje “gjithë turistëve që kanë qenë në Theth të firmosin kundër ndërtimit të HEC-ve mbi lumin e Shallës”.
Në vitin 2009 kur qeveria drejtohej nga Sali Berisha në listën e shumë lumenjve që u dhanë për shfrytëzim për energji ishte edhe lumi i Shallës. Por kompania në fjalë nuk e zhvilloi lejen brenda afatit ligjor të 5 viteve. Ndaj Qeveria Rama ka vendosur ta rinovojë këtë kontratë.
Nga burimet mësohet se kompania që ka fituar koncensionin është duke nënkontraktuar kompani kineze dhe së shpejti pritet të nisë punimet.
Lumi i Shallës që kalon në Theth është atraksioni më i bukur turistik. Thethi eshte shpallur Park Kombetar në 1966 dhe sot numri i turistëve shkon deri në 15 000 persona në vit. /Opinion.al
