Për herë të parë kanë dalë në një konference të përbashkët për shtyp 5 biznesmenë, prodhues të produkte të bulmetit. Të revoltuar ata janë shprehur se media po përhap panik me shpërndarjen e lajmeve, sipas tyre, të pavërteta se gjalpi në Shqipëri ka në përbërje vaj palme.
Biznesmenët thonë se kanë kërkuar të ketë hetim penal për shpërndarjen e këtij informacioni nga emisioni “Fiks Fare” në Top Channel. Po kështu në ndjekje penale është çuar edhe specialisti i INUV që prezantoi në TV analizat e gjalpit e djathit.
Në konferencë foli Alban Zusi Drejtor Ekzekutiv i “Albanian Food Industry” i cili para dy vitesh ka qenë edhe zv/ministër Bujqësie. Po ashtu të pranishëm ishin edhe përfaqësuesit e kompanive Conad, Klegen, Mirel, Lufra, Erzeni dhe Gjiro Farma.
Media-thonë ata- kanë zëvendësuar veprimin e munguar të institucioneve shtetërore, siç është AKU për identifikimin e probleme të ushqimit.
“Gjithçka u tha për kompanitë tona është tërësisht e pavertetë dhe se garantojmë konsumatorët se në asnjë rast ne nuk e kemi përdorur këtë përbërës”, tha Zusi.
“Përpos hetimit administrativ që ka nisur AKU, kemi kërkuar hetim penal për këtë çështje. Akuza të tilla haptazi të pabaza, janë veprime të mirëfilli mafioze që jo vetëm cenojnë interesat e ligjshme të kompanive tona-lider në këtë fushë, por kanë qëllim uzurpimin e manipulimin e tregut dhe shkaktojnë panik dhe pasiguri ke qytetarët, vijoi ai.
“Pikërisht për këtë arsye kemi kërkuar hetime penale për të zbuluar personat që kanë iniciuar, dhe shtytur këtë manipulim dhe mekanizmin e veprimit me qëllim vënien e tyre para përgjegjësisë penale”, u shpreh me tej Zusi. /Opinion.al
