Një nga posterat e vendosura në rrugët e Tiranës nga ekipi i kandidatit të koalicionit “Bashkë Fitojmë”, Belind Këlliçi ka shkaktuar shumë polemika.
Në baner shfaqet Këlliçi me dy gishtat e mesit lart, duke treguar kështu në mënyrë metaforike luftën e tij ndaj korrupsionit.
Domethënien e posterit, Belind Këlliçi e ka sqaruar për Klan News. Ai thotë se nëpërmjet tij tregon se lufta ndaj korrupsionit në Tiranë do të jetë e egër, e ashpër dhe pa etikë.
“Mesazhi im është që do luftoj korrupsion e Tiranës pa kompromis dhe pa etikë. Kjo është një mënyrë e imja për të luftuar korrupsionin në Tiranë, pasi për këtë nuk po flitet askund. Kjo është mënyra ime për të luftuar së bashku me qytetarët e Tiranës. Lufta ime do të jetë e egër e ashpër dhe pa etikë. Për të luftuar korrupsionin, nuk kam nevojë për etikë”-tha Këlliçi.
Planin për Tiranën Këlliçi e ka ngritur në disa pika, si ulja e taksave vendore për bizneset, investimet në infrastrukturë dhe përmirësimin e shërbimeve, por gjithashtu ka premtuar transport publik falas në kryeqytet dhe projekt për nënkalimin në Sheshin “Skënderbej”.
