Gigi Buffon është lënë pushim nga trajneri Allegri për ndeshjen kundër Pescara-s, në mënyrë që të jetë në formën më të mirë të mundshme për ndeshjen e kthimit kundër Barcelona-s në Champions League. Kapiteni i Juventus dhe Italisë ka dhënë një intervistë ku ka folur për rinovimin e Dybala dhe shitjen e Milan. “Rinovimi i Dybala? Një lajm i bukur, për ne dhe për popullin bardhezi. Ai është një simbol i Juves, tani e dimë se do të jetë edhe në të ardhmen. Dhe pas asaj që ka bërë në fushë të martën në mbrëmje nuk mund të kishte zgjedhur një moment më të mirë për ta dhënë këtë lajm që besoj se do ta motivojë akoma më shumë për fazën e fundit të sezonit. Tifozët duan Championsin? Edhe ne”.
Në lidhje me Milan-in: “Uroj që Milan të kthehet skuadra që ka qenë për 25 vite, një pikë referimi. E them për të mirën e futbollit italian. Epoka e Berlusconi-t ka ndryshuar futbollin, në fushë dhe jashtë saj. Ka modifikuar mënyrën e lojës dhe idenë e futbollit. Mendoj se ky ndryshim është rrjedhojë e kohëve në të cilat po jetojmë. Por shpresoj që ata që e kanë marrë ta dinë mirë se çfarë përfaqëson Milan-i për futbollin italian”, ka thënë Buffon.
