Ministrja e Punëve të Jashtme të Kosovës, Donika Gërvalla, mbajti pasditen e së mërkurës një konferencën për media ku foli për mbështetjen e Asamblesë Parlamentare e Këshillit të Evropës për anëtarësimin e Kosovës, por edhe për ndalimin e qytetarëve kosovarë në Serbi.
Ajo u shpreh se ndalimi i kosovarëve lidhet me rezultatin që Kosova mori të martën në Asamblenë e Këshillit të Evropës.
Gërvalla shtoi se presidenti serb Aleksandër Vuçiç ka kërcënuar Kosovën dhe tani po i zbaton ato kërcënime.
“Unë jam e mendimit që një veprim i tillë bazohet në atë që ndodhi ditën e djeshme. Jemi dëshmitar të deklaratave kërcënuese të presidentit serb Vuçiç i cili ka kërcënuar jo vetëm Kosovës po edhe mbështetësit tanë që vota pro Kosovës do të ketë pasoja”, tha Gërvalla.
Ministrja ka deklaruar se në kontaktet që patën me qytetarë dhe familjarët e tyre thuhet se një pjesë e tyre janë marrë në pyetje nga policia e Serbisë.
“Nga biseda direkte që kemi pasë me udhëtarët dhe familjarët e disa prej tyre, po ashtu edhe në takimet e përfaqësuesit të Republikës së Kosovës në Serbi i cili ka qenë në vendin e ngjarjes, është parë se janë shkelur masivisht të drejtat e qytetarëve tanë. Një pjesë i janë nënshtruar edhe bisedave informative. Në shumë prej këtyre marrjeve në pyetje është folur për vitin 1999, janë pyetur për anëtarë të UÇK-së dhe se mos ka të tillë në mesin e udhëtarëve”, ka thënë Gërvalla.
