Ish-ministri i Mbrojtjes, Fatmir Mediu deklaroi se duhet të deklasifikohen raportet e Këshillit të Sigurisë Kombëtare sa i takon çështjes së Gërdecit.
Në një deklaratë për mediat në përfundim të seancës së sotme gjyqësore ai tha se i ka kërkuar Presidencës një shkresë për raportin në fjalë.
Ndër të tjera Mediu theksoi se këtë informacion duhet ta kishte marrë prokuroria me kohë.
“Ka pasur një mbledhje të Këshillit Kombëtar, të cilët nuk kanë përjashtuar mundësinë e ndërhyrjes për të krijuar një situatë para se të ndodhte anëtarësimi në NATO. Na u dha paralajmërim se duhet të kishim kujdes për ndonjë ngjarje para se të anëtarësoheshim në NATO. Këto dokumente duhet të ishin deklasifikuar. Di që është kërkuar që të bëhet një eksperiment me atë shkak që ndodhi shpërthimi. Djali i Deliut ka thënë se babai i tij ka qenë në shtëpi dhe se nuk kishte bërë asnjë saldim. Është në interes të Shqipërisë që të bëjë një hetim.”, tha Mediu.
Pyetje: Çfarë nuk është deklasifikuar?
Mediu: Raporti i Këshillit të Sigurisë Kombëtare, raportet apo dokumentet që kanë vajtur për këtë çështje. Duhet të jepen deponimet e tyre. I kam kërkuar presidentit që të na japë me shkrim këtë dokument që ta depozitoj. Këtë informacion duhet ta kishte marrë prokuroria me kohë.
