Një postim i bërë nga zëvendës kryeministri Erion Braçe një ditë më parë, për 7 prillin e ’39, ka ngjallur debat, e sidomos me historianin Kastriot Dervishi. Numri dy i qeverisë shkruante se Mbreti Zog, i ashpër e gjakatar me popullin e tij, la vendin e s’u kthye me kurrë. Postimi i Braçes shoqërohej dhe me një foto ku në tryezë janë Viktor Emanuel III dhe Ahmet Zogu.
Gënjen apo këtë postim numri dy i qeverisë e ka nga padija? Kësaj pyetjeje nuk mund t’i japim një përgjigje ne, ndërsa për ata që kanë lexuar pak histori e vërteta është krejt ndryshe.
Mbreti Zog nuk mund të kthehej në Shqipëri sepse komunistët e shpallën armik të popullit dhe e dënuan me vdekje. Siç e shpjegon dhe historiani Kastriot Dervishi fotoja e publikuar i takon vitit 1946. Viktor Emanuli III dhe Mbreti Zog gjendeshin miq të mbretit të Egjiptit.
“Italiani kërkoi të takohej me Mbretin Zog. Pasi ky i fundit pranoi, italiani kërkoi falje për pushtimin fashist të 7 prillit 1939. Nuk do kishte drekë pa aktin e faljes që italiani edhe mund të mos e jepte. Në drekë kanë qenë të pranishëm edhe nga familja mbretërore e Egjiptit. Ky takim përmendet në librin e autores Josephine Dedet, “Geraldina Mbretëreshë e Shqiptarëve”. Në drekë janë bërë disa fotografi, të cilat janë pjesë e një albumi që posedon familja mbretërore”, shkruan historiani.
Por çfarë shkruante shtypi ndërkombëtar i kohës. Kjo është një faqe e gazetës New York Times e datës 8 prill 1939.
Por siç duket indoktrinimi është kaq i madh pasi pjesa më e madhe e shqiptarëve është ushqyer me materialet e Kinostudios “Shqipëria e Re”, e për fat të keq njohja e historisë së vërtetë është një privilegj që ende e kanë pak njerëz./ Opinion.al
