Një balenë e vogël ka ngordhur në Tajlandën jugore pasi gëlltiti 80 çanta plastike.
Balena pilot u gjet në një gjëndje shumë të rëndë, ndërsa shpëtuesit për 4 ditë bënë të pamundur për t’a shpëtuar.
Nga ekzaminimi që iu bë pasi kishte ngordhur, në stomak, u zbuluan 80 çanta plastike.
Një biolog detar, Thon Thamrongnawasawat tha se çantat nuk e kishin lejuar balenën të merrte ushqimin e saj.
“Nëse keni 80 çanta plastike në bark, ju vdisni,” -tha ai.
“Nga plastika e hedhur në ujrat detare të Tajlandës, të paktën 300 kafshë detare ngordhin çdo vit, duke përfshirë balenat pilot, breshkat e detit dhe delfinët”, shtoi ai.
“Është një problem i madh, ne përdorim shumë plastikë”,-tha Thamrongnawasawat.
Vitin e kaluar, Ocean Conservancy, zbuloi se Tajlanda është një nga pesë ndotësit më të mëdhenj në botë, së bashku me Kinën, Indonezinë, Filipinet dhe Vietnamin.
Këto vende janë përgjegjëse për më shumë se gjysmën e plastikës së hedhur në oqean çdo vit dhe që mendohet të kapi nga tetë deri në trembëdhjetë milionë ton mbetje.
Departamenti i Burimeve Detare dhe Bregdetare në Tajlandë tha në Facebook se balena pilot u gjet të hënën pranë kufirit me Malajzinë.
Ekipet e shpëtimit u përpoqën për t’a shpëtuar, duke e mbajtur gjitarin në det dhe i vendosën edhe një tendë për t’a mbrojtur nga dielli përvëlues, por gjithçka ishte e kotë. Balena ngordhi.
