Talenti kuqezi, Milot Rashica po tërheq vëmendjen e të gjithëve. Përveç jehonës së madhe që po i bëhet në Holandë, së fundmi për djaloshin e Viteses kanë filluar të thurin elozhe edhe mediat italiane.
Prestigjozja, “Gazzetta Dello Sport”, në suplementin e saj të përjavshëm ka bërë një përzgjedhje të 50 futbollistëve nën 20-vjeç, që do të jenë nesër në elitën e futbollit Botëror.
Mes emrave tashmë të njohur në arenën botërore si Donaruma i Milanit, Halilovic, Koman edhe shumë të tjerë, por ajo që bie në sy është se në listën e këtij artikulli është dhe emri i Milot Rashicës.
Në profilin e përshkrimit të 19-vjeçarit nga Vushtria, “Gazzetta” e nis me ngacmimin, “Një Europian si titullar me De Biasin? Është e mundur!” duke e përkufizuar më pas Rashicën si një anësor sulmi i paparashikueshëm.
Në artikull theksohet se ai i feston golat në Eredivisie me shenjën e shqipes, në nder të Shqipërisë. Një tjetër vlerësim ky për futbollistin që ka shpërthyer këtë sezon në me Vitessen duke shënuar 7 gola deri më tani në kampionatin holandez.
