Një ditë më parë mediat në Prishtinë raportuan se gazi i përdorur në protestat e opozitës nga Policia shqiptare ishte marrë në Kosovë. Sipas raportimeve, thuhet se mes Tiranës dhe Prishtinës ishte bërë një marrëveshje sekrete, ndërkohë që kryeministri Edi Rama thoshte se gazi ishte aty që në kohën e Qeverisë “Berisha”, pas protestës së 21 janarit 2011.
LEXO EDHE- Gazi lotsjellës kundër opozitës, marrëveshja sekrete që e solli nga Kosova
Lidhur më këtë çështje, Policia e Kosovës ka reaguar zyrtarisht, duke dhënë informacion për huazimin e gazit lotsjellës të bërë nga policia shqiptare .
“Në aspektin ligjor, paraprakisht janë marrë mendimet pozitive edhe nga ana e Zyrës Ligjore të Ministrisë së Punëve të Brendshme të Kosovës dhe e Policisë së Kosovës, përfshirë edhe pëlqimin e dhënë nga ana e kompanisë prodhuese të gazit lotsjellës”
Duke u bazuar në procedurat ligjore për marrëveshjen e bashkëpunimit mes Shqipërisë dhe Kosovës, huazimi i gazit lotsjellës është bërë pasi ka marrë autorizimin e ministrive kompetente, pëlqimin e kompanisë dhe mendimin pozitiv të zyrave ligjore.
“Mbi bazën e bashkëpunimit ndërinstitucional, me shtetet fqinje në këtë rast jo vetëm me Shqipërinë, Policia e Kosovës shkëmben personel policorë, patrullime dhe trajnime të përbashkëta si dhe pajisje logjistike sipas nevojës. Policia e Kosovës, inkurajon mediat dhe gazetarët që para publikimit të informacioneve, t’i drejtohen policisë, për sqarimin e informacioneve dhe marrjen e informatave zyrtare, në mënyrë që të ketë informim të drejtë të opinionit publik, sepse të gjitha veprimet e ndërmarra janë realizuar sipas ligjeve në fuqi”,-thuhet në reagimin e Policisë së Kosovës./ Opinion.al
