Gazetarja e kronikës së zezë në news 24 Klodjana Lala, ka thënë se ish shefi i krimit ekonomik Ervin Dalipaj dhe Juxhin Dautaj përpara se të ekzekutoheshin në atentatin në Sukth kanë qenë nën shoqërinë e dy femrave.
Lala tha se burimet pranë Prokurorisë thonë se ata janë takuar në autostradën Tiranë-Durrës me dy femra: “Prokuroria thotë se përpara ekzekutimit dy viktimat janë takuar me dy femra që prokuroria po kërkon për të gjetur gjurmët. Po ashtu po merren kamerat e bizneseve të zonës ku mendohet se janë takuar”,- tha Lala.
Sipas gazetares kjo ngjarje nuk mund të parandalohej edhe pse Dalipaj në makinë ka patur armë, por nuk ka mundur dot ta përdorë: “Kur e kam takuar para ekzekutimit ai ishte i qetë, nuk pranoi të shkoja me operator por kam xhiruar me telefonin tim. Ai u shpreh se nuk kishte marrëdhënie personale me Collakun për vrasjen e të cilit akuzohej. Unë mendoj se ishte ngjarje që nuk mund të parandalohej, në makinë viktimat kanë patur armë por nuk kanë pasur mundësi t’i përdorin”,- tha Lala. /opinion.al
