Vijon ende jehona e incidentit me konferencën e shtypit dhënë në Teatrin “Kujim Spahivogli”, midis aktorit Gaz Paja dhe gazetares Alma Mile.
“Konflikti” nuk mbeti vetëm brenda konferencës së shtypit, pasi ai u trajtua gjerësisht edhe më pas, kur vetë protagonistët folën mbi ngjarjen(Gaz Paja në Top Channel), dhe gazetarja Mile me një shkrim të saj.
Në mbrojtje të gazetares Mile si fillim janë rreshtuar gazetarja e TVSH, Anisa Ymeri e së fundmi edhe kolegia tjetër e kulturës, Luela Myftari, gazetare e Vizion Plus.
Në një shkrim të publikuar te Gazeta Tema, Myftari lëshon akuza të forta ndaj Pajës kur analizon atë që ndodhi.
“Gazetarja e sulmuar në skenën teatrale nuk flet, “gazetarucja nr. 1”. Një tjetër, “gazetarucja nr.2” tregon historinë. Ai thotë përballë kamerave, që ato që shkruajnë për të tilla histori janë gazetarucë. (Unë i bie të jem “gazetarucja nr.3”). Thotë se shumica e tyre janë kurva, se një Zot e di se si e mbajnë vendin e punës, se kush e di me kë janë lidhur dhe se ai nuk është një profesor. Në fakt, nuk është profesor. Ai ishte thjesht një rol që na tregoi pak më shumë prej tij. Fama të bën të dhjamosësh surratin, jo për marr ca tule në ije për t’i vënë në buzë a gjoks, si shumë vajza, por për të treguar se je njëlloj si ato kur nga goja nxjerr fjalë që s’i kanë hije një artisti, të paktën, jo kur nuk ke mbathur kostumin e personazhit.
Gaz, besomë, atë ditë u përpoqa shumë t’i ulja tonet e konfliktit bashkë me Almën dhe të gjitha vajzat që kishe përpara në sallën e teatrit. Ta dhamë fjalën tre herë, tre mundësi për të mos e vazhduar më konfliktin. Në fund, falenderuam Mehdi Malkën e Genc Fugën që shpëtuan konferencën e shfaqjen. Por, kjo nuk pritej. Një javë më pas, na shan gazetarucë, e pastaj kurva.
Ne jemi ato që ta ngrejnë lart, emrin, Gaz”,- shkruan Myftari ndër të tjera.
“Nuk do të them je aktor i mirë apo i keq, sepse nëse do ta bëja këtë me siguri do isha në rastin më të mirë “gazataruce” e në rastin më të keq “kurvë” që kush e di si e mbaj vendin e punës. Mbase po të jap, rëndësi me këtë shkrim, sepse edhe publiciteti i keq, bën mirë.
Ne jemi ato që zbulojmë edhe kush fshihet pas kostumit të personazhit. Dhe nëse nuk di të flasësh përtej skenës, mos e bë. Ne kurrë nuk jemi konfliktuar me Robert Ndrekikën që nuk na dha intervistë, as me Ndriçim Xhepën e as me askënd që vesh kostumin e personazhit dhe përcjell art. Nuk mërzitemi, nëse nuk flet, por mërzitemi kur mosmirënjohja na tregon se jemi gazetaruce kurva. Thonë që pyll pa derra s’ka. Mua më vjen mbarë të them se edhe lluc pa derra, ka.
Ne jemi ato që ta ngrenë lart, emrin, Gaz”,- përfundon shkrimi i gazetares Luela Myftari./blitz.al
