Gazeta gjermane ‘Bild’ ka publikuar ditën e djeshme në faqen e saj një shkrim sipas të cilit kryetari i Partisë Demokratike Lulzim Basha ka lobuar kundër integrimit të Shqipërisë në BE.
Sipas këtij shkrimi, burimi i parave të lobimit ishte rus.
Por që prej ditës së sotme shkrimi nuk gjendet më në faqen e gazetës pasi është fshirë.
Nuk dihet ende shkaku i fshirjes së këtij shkrimi dhe gazeta ende nuk ka dhënë një version për këtë ngjarje të ndodhur.
Disa muaj më parë gazeta gjermane ‘Bild’ u vu në qendër të vëmendjes pasi publikoi disa përgjime të dosjes ‘184’ dhe ‘339’ të Prokurorisë së Krimeve të Rënda ku shfaqeshin zyrtarë, deputetë dhe ministra të Partisë Socialiste duke biseduar në lidhje me fushatën elektorale. Në disa prej këtyre bisedave flitej për favore në këmbim të votave madje në disa raste edhe për blerjen e tyre.
Kryeministri Rama paralajmëroi se do ta çonte në gjyq këtë gazetë për shpifje por deri tani ende nuk është konfirmuar një padi e tillë.
Partia Demokratike që nga ajo kohë i ka bërë thirrje Prokurorisë të hetojë këto dosje pasi sipas saj pretendohet se aty vërtetohet krimi elektoral i ndodhur në zgjedhjet e vitit 2017 dhe përfshirja e PS në blerje votash. Për këtë ata kanë kërkuar së fundi që dosja ti kalojë në hetim SPAK. /Opinion.al
