Palestina hidhet në kundërofensivë. Të paktën 500 raketa janë lëshuar nga Gaza në drejtim të Izraelit, vetëm gjatë orëve të fundit.
Pjesa më e madhe e tyre kanë rënë në një rreze rreth 40 kilometra nga Rripi, ndërsa disa prej tyre kanë arritur edhe në qendër të shtetit hebre.
Mediat lokale raportojnë se dëmet materiale janë tepër të pakta, falë përdorimit të sistemeve të mbrojtjes ajrore, Iron Dome.
Nuk ka pasur as të lënduar apo viktima. Sulmi është kundërpërgjigjja e Palestinës pas bombardimeve të fundit nga Izraeli që shkaktuan vdekjen e të paktën 25 persona, mes të cilëve 4 gra dhe 5 fëmijë.
Nuk ka munguar as kundërpërgjigjja nga Tel Avivi. Izraeli njoftoi se ka vrarë kreun e Xhihadit Islamik Palestinez gjatë bombardimit të një apartamenti në Gaza.
Ushtria e shtetit hebre bën të ditur se ka goditur të paktën 130 shënjestra të militantëve në Gaza, në ato që po konsiderohen si luftimet më të ashpra në 9 muajt e fundit.
Kryeministri Benjamin Netanjahu, në një takim me kryetarët e bashkive të qyteteve jugore izraelite, tha se Izraeli “është i gatshëm të zgjerojë operacionin aktual dhe të shkaktojë goditje të rënda në Gaza”.
Ndërkohë, Egjipti është vënë sërish në punë në përpjekje për të arritur një armëpushim mes të dyja palëve.
