Kampionët e rinj të Spanjës dhe njëkohësisht kampionët në fuqi të Europës, në garë për t’u rikonfirmuar gjatë mbrëmjes së 3 qershorit në Kardif, Reali i Madridit, do të ketë përballë në një nga testet miqësore të verës një formacion të përbërë nga 11 “yjet” e kampionatit amerikan të futbollit. Ndeshja do të luhet më 2 gusht në Çikago.
Përzgjedhja e lojtarëve që do të përfaqësojnë “yjet” e MLS-së është në dorën e fansave të futbollit amerikan, të cilët për të votuar duhet të përdorin aplikacionin e kampionatit.
Mes kandidatëve që mund të përzgjidhen janë dhe dy futbollistët shqiptarë që aktivizohen te Kolorado Rapids dhe San Hoze Ërthkuejks, përkatësisht Shkëlzen Gashi dhe Jahmir Hyka. Klubet e tyre kanë filluar “fushatën zgjedhore” teksa i kanë paraqitur si kandidatë mes futbollistëve të tjerë dhe tashmë është në dorën e sportdashësve për të vendosur.
Në rast se do të ishin mes të përzgjedhurve, për të dy futbollistët e kombëtares shqiptare do të ishte një privilegj i madh që të kishin si rivalë në fushë disa nga yjet e futbollit botëror që aktivizohen në radhët e madrilenëve.
