Deputeti Agron Shehaj ka prenzantuar, ditën e shtunë, themelimin e forcës më të re politike në vend, “Mundësia”. Për të folur për këtë lëvizje, ai ka dhënë një intervistë për emisionin ‘Opinion’ në TV Klan. Shehaj shprehet se në fokus të projektit të tyre politike është ekonomia, sepse sipas tij ky është i vetmi mjet për t’i bërë shqiptarët që të mos mendojnë që të ikin nga Shqipëria, por edhe që të kthehen në Shqipëri.
Agron Shehaj: Unë e kuptojë që njerëzit janë mësuar duke parë një model politikë dhe çdo gjë të re që lind e shikojnë në krahasim me atë model politike. Dhe nëse je ndryshe nga ai model politike, duket sikur ke më pak shanse të fitosh, pasi 30 vite ne atë model kemi parë. Unë mendoj totalisht ndryshe. Unë mendoj se ajo çfarë ne duam të japim, duhet te jetë komplet ndryshe me atë çfarë kemi parë më herët.
Fjalimi im në konvent kishte të bënte me të ardhmen, kishte të bënte me ekonominë që është e vetmja shpresë dhe i vetmi mjet që kemi për t’i bërë shqiptarët që mos të mendojnë që të ikin nga Shqipëria. Sepse njerëzit duan një jetë më të mirë. Një jetë më të mirë mund ta ndërtojnë vetëm nëse kanë një ekonomi më të mirë, nëse kanë rroga më të larta, nëse kanë të ardhura më të larta. Ekonomia është thelbi dhe është ajo që i shtyn njerëzit që të ikin dhe ajo që i mban njerëzit mos të ikin. Ekonomia është ajo që do t’i bëj shqiptarët që të vijnë në Shqipëri. Mund të vijnë edhe nga atdhetarizmi, absolutisht. Unë kam marr një nga elementët pse edhe unë kam ardhur në Shqipëri. Ka qenë pikërisht, sepse unë jam shqiptarë dhe është atdheu im edhe e di shumë mirë se çfarë provojnë shqiptarët që jetojnë jashtë. Të gjithë do të donin një ditë që të ktheheshin. Të gjithë pa përjashtim. Por duhet të gjejnë kushte për tu kthyer, dhe kushtet që duhet tu ofrojmë që ata të vijnë kanë të bëjnë me ekonominë.
Të kenë mundësi që këtu të kenë një siguri ekonomike. Vetëm në këtë mënyre këta që janë këtu nuk do ikin dhe ata që janë jashtë edhe mund të kthehen. Prandaj ne duhet tu flasim njerëzve për të ardhmen. Ne kemi një projekt politikë afatgjatë që synon dhe ka prioritet kryesor ekonominë. Dhe shpesh, ajo që ndodh në politikë, flitet për gjithçka, vetëm për problemin e ekonomisë nuk flitet. Nuk flitet për kapjen e tregut, nuk flitet për kapjen e mundësive.
