Presidentja e Kosovës, Vjosa Osmani është shprehur e hapur për mbajtjen e zgjedhjeve të reja në komunat e veriut.
Në një intervistë të dhënë për agjencinë e lajmeve ‘Reuters’, Osmani shprehet se Kosova mund të organizojë zgjedhjet e reja në 4 komunat vetëm nëse 20% e votuesve nënshkruajnë një peticion me këtë kërkesë.
“Në këtë mënyrë, besoj se do të siguronin pjesëmarrjen e serbëve pasi kërkesa do të vinte nga ta, nga qytetarët,” citohet të jetë shprehur zonja Osmani.
Osmani tha se shkarkimi i kryetarëve të komunave përmes një peticioni votuesish do të ishte “një lloj referendumi” i cili do të hapte rrugën për një votim të dytë që do të mbahej për zgjedhjen e kryetarëve të rinj.
Sipas Osmanit, i gjithë procesi mund të kryhet brenda disa muajsh. Megjithatë, mbetet për t’u parë nëse serbët do të marrin pjesë në peticion. Ajo tha se para se të shpallen zgjedhjet e reja, Kosovës do t’i duhen sigurimet nga bashkësia ndërkombëtare se Beogradi nuk do të ndërhyjë.
Kujtojmë që tensioni në veri të Kosovës, nisi që prej datës 29 maj ku qytetarët serbë nisën protestat për të kundërshtuar hyrjen e kryetarëve të rinj shqiptarë në ndërtesat komunale./Opinion.al
