Goli me roveshatë i Cristiano Ronaldos ndaj Juventusit në çerekfinalen e parë të Champions League ka hapur edhe një herë garën se cili është goli më i bukur i shënuar në këtë mënyrë.
Në fakt të tillë janë shënuar shumë, por këto lloj goditjesh duhen vlerësuar për nga rëndësia e ndeshjes si dhe ekzekutimi i gjithë aksionit. I pyetur pas ndeshjes Juve – Real si e vlerësonte golin e Ronaldos në krahasim me të tijin ndaj Bayer Leverkuzen në finalen e Champions League në 2002-in, trajneri Zinedine Zidane, me shaka tha, se goli i tij ishte më i bukur.
Ndërkaq Zlatan Ibrahimoviç e pozicionon golin e tij më lart duke sfiduar Ronaldon pasi goli i tij ndaj kombëtares angleze u realizua nga një distancë më shumë se 20 metra. Edhe roveshata e Wayne Rooney në 2013-ën merr vlerë pasi u shënua në derbin me Manchester City.
Një perlë është edhe ajo e Ronaldinhos ndaj Villareal. Në listën e roveshatave më të bukura nuk mund të mungonte goli i Marco van Basten ndaj Den Bosch. Ne shqiptarët mund të krenohemi me roveshatën e Hamdi Salihit kur luante për Hapoel Acre në kampionatin izraelit.
Tv Klan
