Deputetja e PD, Orjola Pampuri, ka një qëndrinm të kundërt me kryetaren e Lidhjes së Gruas në Partinë Demokratike, Albana Vokshi lidhur me zgjedhjet në Lidhjen Demokratike të Gruas së Shqipërisë.
Në një reagim në rrjetet sociale teksa e ka cilësuar këtë strukturë si ineksiztente Pampuri, është shprehur se në vendimin e kreut të PD Lulzim Basha për të nisur një proces zgjedhor në Lidhjen Demokratike të Gruas së Shqipërisë nuk ka azgjë antidemokratike.
“Nuk ka asgjë antidemokratike në vendimin e Kryetarit Basha për të zgjedhur Kryetaren e re të LDG dhe strukturat inekzistente drejtuese të Lidhjes. Zgjedhja e kryetares së LDG-së me parimin “një anëtar, një votë” është një lajm i mirë për të gjitha gratë dhe vajzat demokrate, që besojnë tek PD dhe duan të japin kontributin e tyre.
Zonja Albana Vokshi është emëruar në ketë detyrë që në vitin 2009 nga Kryetari i PD, pa garë. Mandati i saj ka skaduar prej të paktën 8 vitesh dhe askush nuk mund të pretendojë për legjitimitetet apo demokraci në drejtimin e LDG. Shumë pak e dinë, por LDG nuk ka patur në 12 vjet asnjë strukturë përveç Kryetares me mandat të skaduar. Zonja Vokshi nuk e miratoi kurrë statutin e LDG, siç e urdhëron Statuti i Partisë, nuk hapi kurrë garë për asnjë strukturë drejtuese të Lidhjes. Nën drejtimin e znj. Albana Vokshit, LDG nuk ka patur as Sekretare të Përgjithshme, as Nënkryetare, as Kryesi, as Këshill Kombëtar. Ky mund të jetë akti më antidemokratik që mund të bëhet ndaj një forumi politik.
Pas procesit të nisur sot nga Kryetari Basha do të sigurohet zbatimi korrekt i statutit të PD, në mënyrë që organizimi i LDG të jetë i ngjashëm me atë të PDSH. Për këtë arsye, Kryesia e PD do duhet të miratojë edhe Statutin për funksionimin demokratik të LDG për t’i dhënë fund praktikës antidemokratike të uzurpimit të Kryetares së Lidhjes për 12 vjet, pa votë.Suksese zonjave demokrate në këtë proces të rëndësishëm demokratik, që ndodh për herë të parë në Shqipëri dhe që do të jetë modeli më i mirë për përfaqësimin dinjitoz të grave dhe vajzave”, shkruan Pampuri.
Më herët, deputetja e PD dhe njëkohësisht kryetarja e Lidhjes së Gruas në Partinë Demokratike, Albana Vokshi, në një reagim të gjatë në rrjetet sociale, është shprehur se vendimi i kreut të PD Lulzim Basha për të nisur një proces zgjedhor në Lidhjen Demokratike të Gruas së Shqipërisë “është arbitrar, uzurpues dhe i bërë në mënyrë qesharake me telefonatë”./Opinion.al
