Vetëm pas pak ditësh do të nis punën SPAK, por deri më tani ende nuk dihet se kush do të jetë drejtuesi i këtij institucioni të rëndësishëm për drejtësinë shqiptare.
Në garë janë tre kandidatë, Altin Dumani, Arben Kraja dhe Edvin Kondili kërkojnë të drejtojnë strukturën e re që do të ketë objekt të punës së saj hetimin e niveleve të larta të krimit të organizuar, por edhe të pushtetarëve të përfshirë në korrupsion.
Ndërkohë, ka nisur sot intervistimet për drejtuesin e këtij institucioni dhe i pari që doli para KLP është Altin Dumani, i cili paraqiti platformën e tij në drejtimin e këtij institucioni.
Sipas tij, gjëja e parë që ai do të bëjë nëse zgjidhet në krye të SPAK është që të fillojë procedurën për kreun e Byrosë Kombëtare të Hetimit.
“Në prokurorinë e posaçme duhet që prokurorët të ndahen sipas specializimeve që ata kanë. Duhet të fillohet me dy seksione, seksioni për hetimin e krimit të organizuar dhe hetimin e zyrtarëve të shtetit Hapi i parë, brenda javës së dytë të punës është fillimi i procedurës së përzgjedhjes së BKH. Ky institucion është si një mushkëri që furnizon me ajër SPAK. Pa këtë puna jonë do të vështirësohet. Javën e dytë të punës do të bëj njoftimin, ftesën për aplikim për drejtor të BKH,-tha Dumani.
Ndërkohë, pas Altin Dumanit, i ka ardhur radha Arben Krajës që të intervistohet nga SPAK për garën e drejtuesit të SPAK.
Kraja paraqiti vizionin e tij para KLP: “Jam i ndërgjegjshëm për punën që na pret për ngritjen dhe efektivitetin e kësaj strukture. Kam eksperiencë drejtimi e cila garanton suksesin tim në drejtim të institucionit. Drejtuesi do të ketë eksperienca manaxheriale, njohuri administrative, financiare. Kam bashkëpunuar me organizatat ndërkombëtare për draftimin per sekuestro parandaluese, për imunitetin e zyrtarëve të lartë. Kërkoj besimin e KLP për të drejtuar këtë institucion të ri ku të vë në praktikë aftësitë e mia drejtuese”.
Po ashtu, kandidati i tretë për kreun e SPAK, Ervin Kondili, ka shpalosur vizionin e tij në lidhje me udhëheqjen e SPAK.
Kondili deklaroi se; “Ngritja e SPAK do të bazohet në objektiva konkrete dhe në afate sa më të shpejta: krijimi i BKH do të vijë si plotësuese e SPAK.”
Pjesë nga fjala e Kondilit
Kam shprehur dëshirën për drejtimin e SPAK nisur nga motivimi dhe eksperienca ime. Ngritja e SPAK do të bazohet në objektiva konkrete dhe në afate sa më të shpejta: krijimi i BKH do të vijë si plotësuese e SPAK. Garantimi total i pavarësisë së prokurorëve, mentaliteti i ndryshuar i prokurorëve është larg centralizimit të dikurshëm. Prokurori është përgjegjës për të gjitha veprimet e veta. Organizimi i veprimit për çështjet nën hetim, protokolle hetimore konkrete me afate të qarta hetimi. Puna në grup, një qellim i përbashkët i gjithë SPAK: aplikimi i hetimeve proaktive për hetime pasurore. Opinioni publik pret rezultate konkrete dhe është detyra jonë parësore të vijmë në pritshmërinë e tij. Bashkëpunimi me agjensitë e tjera ligjzbatuese me rëndësi të veçantë: efektiv, në kohë sa më të shkurtër dhe me mjetet më të përshtatshme për çdo çështje./ Opinion.al
