Edhe pse një ditë para mbajtjes së zgjedhjeve për kryetar të PD, kandidatët ende nuk kanë dërguar përfaqësuesit për 76 komisionet që do të jenë në të gjithë vendin. Kryetari i Komisionit Zgjedhor në PD, Jemin Gjana tha se kandidatët duhet të dërgojnë emrat e përfaqësuesve në komisione para nisjes së procesit të votimit.
Gjana tha se dhe në rast se kandidatët nuk do të dërgojnë përfaqësuesit e tyre në komisione, procesi i votimit do të vijojë. Po ashtu, kryetari i Komisionit Zgjedhor tha dhe nëse katër kandidatët vendosin si përfaqësues emra që nuk janë anëtarë të PD nuk do lejohen në komisione.
Sapo përfunduam një nga mbledhjet e Komisionit të sotëm. Miratuam listën jo përfundimtare sepse nuk janë përfaqësues për të gjitha komisionet. Kadilli ka sjellë përfaqësues në 54 komisione nga 76. E miratuam listën pasi bëmë verifikimin e të qenit anëtar të PD. Kam bërë një njoftim në mëngjes për tre kandidatët dhe përfaqësuesit e tyre. I vetmi që ka reaguar deri tani është Kadilli. Kam një telefonatë të zotit Kapri që është duke e përgatitur listën dhe mund ta dorëzojë deri në orët e pasdites. Nuk kam ende një njoftim nga zonja Harxhi. Asnjë emër nuk bëhet pjesë e komisioneve të votimit dhe numërimit që nuk është anëtar partie dhe nuk i takon degës ku ngarkohet. I ftoj edhe njëherë që në kohën më të shpejtë të mundshme që komisionet të komunikojnë me njëri tjetrin që nesër në mëngjes të jenë të hapura qendrat e votimit. Nëse nuk dërgohen anëtarë të PD ata nuk bëhen pjesë e Komisionit por kjo nuk do të thotë se procesi zgjedhor nuk do fillojë. Janë nisur në të gjitha qarqet i gjithë materiali zgjedhor. Listat janë mbyllur dje. Fletët e votimit, dhomat e fshehta dhe çdo gjë tjetër po shpërndahet përfundimisht dhe deri nga dreka përfundon në të gjitha qarqet. Kandidatët që nuk sjellin emra janë në të drejtën e tyre. Komisioni nuk cakton përfaqësues të kandidatëve”, deklaroi Gjana.
Ditën e diel 75 mijë e 67 anëtarë të PD do i drejtohen kutive të votimit për zgjedhur kandidatin i cili do të udhëheq për katër vite selinë blu. Në këto zgjedhje, Lulzim Basha sfidon për një mandat të tretë në krye të PD, Edith Harxhin, Fatbardh Kadillin dhe Agron Shehajn.
