Opozita ngriti sot me shqetësim rrahjen e gazetarit të RD në protestën e 26 Majit. “I bëjmë thirrje Kryeministrit dhe ministrit Xhafaj të dënojnë dhunën policore ndaj kryeredaktorit të gazetës opozitare, Bledi Kasmi dhe të distancohen nga çdo akt dhune”, deklaroi Albana Vokshi në Komisionin e Medias.
Kjo u bë shkak për akuza e replika në komision. Deputeti socialist Fidel Ylli tha se në Shqipëri ka patur protesta edhe më të dhunshme, por në këtë moment bën edhe një gafë kur thotë “në bulevard janë vrarë edhe deputetë…” Në dijeninë tonë, gjatë viteve të pluralizimit janë vrarë deputetët Azem Hajdari dhe Fatmir Xhindi, por asnjëri prej tyre s’ka qenë duke protestuar.
Më poshtë replikat Vokshi-Ylli
Fidel Ylli: Këtë konferencë shtypi që ju mund ta bëni tek PD, doni ta bëni në komision. Jemi të detyruar, do tu respektojmë. Të gjithë mund të flisni.
Albana Vokshi: Nuk është konferencë për shtyp.
Fidel Ylli: Keni gjysmë ore që flisni.
Albana Vokshi: Jo, jo. Prononcohuni një herë të vetme.
Fidel Ylli: Prit ta mbaroj, nuk je ti Zoti pse ke mikrofonin në dorë! Na lër dhe ne.
Albana Vokshi: Mos bërtit!
Fidel Ylli: Si të mos bërtas, pse çfarë je ti? Je Zot i kësaj pune? Je kryetare, je njëlloj si unë dhe nuk ke asgjë më tepër. Prandaj dëgjo aty, të dëgjova gjysmë ore dhe më lër të mbaroj. Unë jam sportist, jam adrenalinë.
Albana Vokshi: Je sportit edhe çfarë?
Fidel Ylli: Rri aty dhe dëgjo. Mbaroni konferencën e shtypit dhe ne do ju dëgjojmë. Bledi Kasmit i uroj shërim të shpejtë, detyra e gazetarit ai e di më mirë se ne të gjithë ku duhet të rrijë. Por ju pasi dështuat në atë miting që bëtë, vajtët dhe futët kokën tek policia. Kjo është loja që bëni ju. Po ata policë që hanë gurë, janë bir nënash apo nuk janë bir nënash?
Albana Vokshi: Duhet të mbroni gazetarët. Asnjë prej jush nuk guxoi të prononcohet.
Fidel Ylli: Janë vrarë deputetë në Bulevard, janë vrarë gazetarë.
Albana Vokshi: Kryetari juaj i çoi ato. I çoi mish për top.
Fidel Ylli: Po moj po janë vrarë e janë plagosur qytetarë e gazetarë (nënkupton 21 janarin)
