Suksesi i kombëtares shqiptare të futbollit, i shtrirë në dy ditë, duket se ka lodhur futbollistët kuqezinj, pasi disa prej tyre janë lënë pushim gjatë ditës së sotme në skuadrat ku luajnë.
Shkëlzen Gashi është kthyer në SHBA por klubi i Kolorado Rapids ka vendosur ta lërë pushim në ndeshjen e luajtur ndaj Dallas, për shkak të udhëtimit të gjatë që ka bërë mesfushori shqiptar. Mungesa e tij nuk u ndje në fushën e lojës, pasi Kolorado fitoi me rezultatin 1-0.
Pushim ishin sot edhe Ermir Lenjani me Andi Lilën. I pari nuk u grumbullua për ndeshjen që Ren fitoi me shifrat 2-0 ndaj Metz në kampionatin francez, ashtu si i dyti, i cili ishte pushim në fitoren 3-0 të Janinës ndaj Atromitos.
Spektator në pankinë gjatë të gjithë ndeshjes ishte sot Etrit Berisha me Atalantën, ku duket se do të jetë zëvendësues i Sportielos. Edhe pse ky i fundit bëri disa gabime në takimin kundër Torinos, suksesi 2-1 i Atalantës do t’i mbulojë ato dhe Berisha duhet të mësohet me idenë që do të qëndrojë në stolin e rezervave për një periudhë të gjatë.
Një spektator ka qenë edhe Rei Manaj, i lënë në pankinë gjatë 90 minutave në një ndeshje ku ai do të dëshironte të luante me çdo kusht. Peskara e tij vihej përballe Interit, klubit që zotëron kartonin dhe që është njëkohësisht “skuadra e zemrës” e sulmuesit të talentuar, i cili ka parë se si zikaltrit kanë dalë triumfues nga fusha e lojës me një gol në shtesën e takimit. Në fushë, por jo aq i suksesshëm, ka qenë Naser Aliji, Kaizerslauterni i të cilit është mundur me shifrat 2-0 nga Sandhauzen dhe vazhdon të mbetet në vendin e fundit të Bundesligës 2./Panorama
