Në garën për të mbledhur para sa më shumë përpara zgjedhjeve, fushata e Donald Trump ka bërë një gjetje që po rezulton e suksesshme: shitjen e pipave plastike.
Menaxheri i fushatës së Trump, Brad Parscale, tha javën e kaluar se ekipi i tij ka mbledhur pothuajse 500 mijë dollarë në një javë nga shitja e pipave me mbishkrimin Trump.
Kjo është një shumë e konsiderueshme, duke pasur parasysh gjashtë falimentimet e korporatave të Trump, kompanitë e dështuara dhe aftësinë për të humbur më shumë se 1 miliardë dollarë mes 1985 dhe 1994, shitja e pipave mund të renditet si një nga sipërmarrjet më të suksesshme në biznes të presidentit.
Ideja për pipat, megjithatë, në fakt erdhi nga Brad Parscale, menaxheri i fushatës së Trump.
Sipas Politico, Parscale u irritua kur një pipë letre që po përdorte u gris. Ai shkroi në Twitter për këtë eksperiencë: “Më kanë ardhur në majë të hundës pipat prej letre”, dhe këtu nisi ideja e pipave Trump.
Drejtuesit e fushatës i dërguan një email përkrahësve të tyre, “Making straws again great”. Kur avioni i Parscale u ul në Florida, pipat presidenciale ishin në prodhim dhe një fushatë reklamuese po përgatitej. Prodhimi i parë u shit brenda disa orësh.
Fushata Trump 2020 tha nga shitja ishin mbledhur më shumë se 456 mijë dollarë që nga 19 korriku.
Suksesi i pipave plastike – të cilat sipas fushatës janë të riciklueshme – ka të ngjarë të jetë prej fushatës së liberalëve të cilët lobojnë për ndalimin e tyre pasi krijojnë shumë mbetje në oqeane dhe kanë ndikim drastik në përkeqësimin e mjedisit. Trump ka thënë më parë se SHBA ka probleme më të mëdha mjedisore sesa pipat plastike.
“Pipat liberale të letrës nuk funksionojnë,” lexohet në njoftim.
“Mbështesni Presidentin Trump dhe blini paketën tuaj të pipave të riciklueshme”. thuhet në spotet e reklamave.
Dhjetë pipa kushtojnë 15 dollarë, me një tarifë dërgimi 5.06 dollarë për në New York City.
Në Amazon 250 pipa normale mund të blihen për 9.99 dollarë.
Në SHBA, qytetet bregdetare perëndimore të Seattle – pas një fushate të quajtur “Seattle pa pipa” – dhe Malibu, pranë Los Anxhelosit, i kanë shpallur “luftë” pipave plastike, ndërkohë që ndalimi nga shteti i këtyre artikujve po konsiderohet në Kaliforni dhe Hawaii.
Një studim i kohëve të fundit vlerësoi se rreth 7.5 milion pipa plastike janë të shpërndara në plazhet e Amerikës, në mes të 35 milion ton ndotje plastike të prodhuar në mbarë botën çdo vit, ku rreth një e katërta prej tyre derdhet në lumenj, përrenj dhe oqeane. Shumë vende po lëvizin për të dekurajuar përdorimin e plastikës në forma të ndryshme. /Opinion.al
