Kryeministri Edi Rama ka folur sot edhe për hapjen e fushatës së PS, e cila u kritikua nga opozita duke thënë se “i kthen mitingjet në tallava”.
Në rubrikën “Sy m’sy”, Rama ka deklaruar se nuk ka asnjë rregull të shkruar se njerëzit duhet thjesht të mblidhen e të dëgjojnë fjalime gjatë takimeve elektorale.
Sipas tij, kundërshtarët e kanë kopjuar dhe do vijojnë ta bëjnë në të ardhmen, mënyrën si ai e bën fushatën.
“Këta thonë fushata e PS-së është tallava, është tallje. Si ka mundësi? E para punës, këta nuk e dinë si është tallavaja, janë përbuzës të kulturës shqiptare. Po, po! Janë përbuzës të atij thesari të kulturës tonë, nëse ne hapim dhe bëjmë një takim të madh, kush na ndalon ne që aty edhe të përdorim këngë që janë nga thesari kulturës tonë, sipas qarqeve, edhe valle…Kush e ka ndaluar këtë që kur njerëzit mblidhen në takim elektoral, duhet të rrinë të dëgjojnë me orë të tëra në diell?!
Që kur unë merrem me fushata elektorale, analizojini si i kanë bërë të tjerët. Kush i solli njerëzit nëpër takime?! Edhe kjo historia me këngë e valle, do e shikoni që do e përdorin edhe të tjerët më vonë. Jo merret me bufin, jo programi…Po pse merreni ju me 1/100-ën, një minutë në ditë.
Unë nuk flas 95% të kohës as për bufin, kënetën, Lulin. Unë flas për sfidën historike që ka Shqipëria. Si është e mundur që nuk ka asnjë interes, reflektim, asnjë informacion normal? Si bëhen negociatat, si ka funksionuar Europa ulen atje dhe zdërhallen. Si ka mundësi që ngrihet një akuzë që unë u paskam thënë fëmijëve më shihni lakuriq?!
Unë ju tregoj një histori që është e trishtueshme, këta që nuk pyetën për fëmijët kur më nxorrën lakuriq kur isha në punën time, rininë time, lirinë time nëpër Europë?! Për të treguar që janë të revoltuar, shkojnë në Korçën e serenatave, ballove dhe aty e merr fjalën Ilir Vrenozi. Unë s’bëj shaka fare, lideri i vërtetë i tyre. Shfrenojnë gjuhën, si mund të mblidhet një parti në miting dhe të ekzaltohet me fjalët më të neveritura?!”, shprehet Rama.
