Filipinet janë të njohur për trajnimin e infermierëve dhe dërgimin e tyre në të gjitha cepat e botës, por tani kombi e gjen veten në situatë të vështirë, mes mungesës së infermierëve dhe numrit në rritje të infeksioneve dhe vdekjeve. Numri i vdekjeve nga Covid-19 është rritur gati pesëfish që nga 1 prilli dhe ka arritur në 462, dhe rastet e konfirmuara janë trefishuar në 6,981. Ky fenomen po ndodh pavarësisht masave të vendosura nga presidenti Rodrigo Duterte të paktën deri në 30 Prill.
Ekziston një mungesë prej 23,000 infermierësh në të gjithë vendin, sipas Shoqatës së Spitaleve Private të Filipinasve. Situata është aq e rëndë, saqë shumica e Filipinasve po vdesin pa u vizituar nga një profesionist mjekësor, tha një ligjvënës. Ndërkohë, rreth 150,000 infermierë filipinas aktualisht po punojnë vetëm në SHBA
‘Më mbetet gjithmonë në mendje: fakti që vajza ime është infermiere në një tokë të huaj në këtë kohë të pandemisë, kur bashkatdhetarët e mi kanë po aq, nëse jo më shumë, nevojë për shërbimet e saj,’- tha Gemma Borilla, 55 vjeç, nga Manila. Vajza e saj 32-vjeçare punon në Arabinë Saudite.
Filipinasit arritën një mesatare vjetore prej rreth 26,000 infermierësh të liçencuar nga 2012 deri në 2016, ndërsa rreth 18.500 lëvizën jashtë vendit çdo vit, sipas të dhënave të qeverisë.
Më 2 Prill, Filipinasit ndaluan largimin e punonjësve shëndetësorë jasht shtetit, për të ndihmuar vendin në luftën kundër koronavirusit. Por pas sulmeve nga një diplomat i lartë i shtetit, qeveria lehtësoi masën, në mënyrë që ata punëtorë me kontrata punë në shtete të tjera, të mund të largoheshin.
Pagesa më të larta dhe kushtet më të mira pune, janë arsyet kryesore pse infermierët dhe mjekët vendosin të largohen nga Filipinet. Në janar, ndërsa virusi filloi të shpërhapej në Kinë, Duterte nënshkroi një ligj për rritjen e pagave për të gjithë punonjësit e qeverisë – përfshirë infermierët – deri në vitin 2023.
Ndërkohë, disa spitale janë duke u përpjekur të kompensojnë mungesën duke u kërkuar infermierëve që të punojnë me orar të zgjatur dhe duke punësuar studentë nga universitetet mjeksore,- tha Rustico Jimenez, president i shoqatës së rreth 900 spitalet private. /Opinion.al
