Dyzet e një emigrantë humbën jetën pasi një varkë e vogël, e cila u nis nga Sfax në Tunizi, u përmbys ndërsa lundronte në ngushticën e Siçilisë.
Sipas mediave italiane, vetëm 4 persona arritën të shpëtonin, mes tyre 3 burra dhe një grua, të cilët u shpëtuan nga mjeti lundrues Rimona, i cili mëngjesin e sotëm i transferoi në skafin e patrullës së Rojës Bregdetare CP327.
Katër të mbijetuarit me origjinë nga Bregu i Fildishtë dhe Guinea Konakry, zbarkuan në Lampedusa. Ato u thanë ushtarëve të rojes bregdetare se 45 prej tyre u larguan nga Sfax, duke përfshirë 3 fëmijë.
Pas rreth 6 orësh lundrim, anija prej 7 metrash u përmbys për shkak të një dallge të madhe. Të gjithë emigrantët, sipas të mbijetuarve përfunduan në det.
Vetëm 15 kishin jelek shpëtimi, por gjithsesi nuk arritën të shpëtonin.
Sipas dëshmisë së të tre burrave dhe gruas në gjendje shoku, janë 41 viktima mes tyre 3 fëmijë.
Kujtojmë që më shumë se 1800 njerëz kanë humbur jetën deri më tani këtë vit në kalimin nga Afrika e Veriut në Europë./Opinion.al
