Nisma “Fundjavë ndryshe” tashmë prej 17 muajsh në ndihmë të familjeve të varfra dhe shtresave më vulnerabël në Shqipëri, ka arritur të japë kontribut të drejtpërdrejtë në më shumë se 9600 familje. Falë kësaj iniciative, që ka nxitur bamirësinë tek shqiptarët janë ndërtuar 20 shtëpi, janë punësuar 270 persona dhe janë shpërndarë 90 bursa studimi.
Pikërisht për këtë kontribut që ka përfshirë më shumë se 6000 të rinj në të gjithë vendin, presidenti i Republikës Bujar Nishani, i ka dhënë “Fundjavë Ndryshe” titullin “Për merita të veçanta civile”, me motivacionin: “Në shenjë vlerësimi ndaj veprimtarisë dhe kontributit të vyer dhënë nga “Fundjavë Ndryshe”. Në një periudhë të shkurtër, me punë të palodhur, i ka dhënë shpresë e ndihmë konkrete shumë familjeve në nevojë ekstreme, duke vendosur ura lidhëse njerëzore mes tyre dhe bamirës të ndryshëm”.
Në ceremoninë e zhvilluar në presidencë, morën pjesë aktivistë dhe përkrahës të kësaj lëvizjeje, që synon të nxisë bamirësinë dhe të zbusë varfërinë në rastet e saj më ekstreme.
