Fundjava në Shqipëri do të jetë në ndikimin e masave ajërore të qëndrueshme dhe të nxehta.
“Parashikohet që të ketë mot të qëndrueshëm në të gjithë territorin shqiptar duke bërë që të vijojmë të kemi dominim e intervaleve të gjata me diell, të cilat më të dukshme do të jenë deri në orët e mesditës, kryesisht këto do të jenë të fokusuar në zonat bregdetare dhe në qytetet e zonës së ulët, ndërsa në zonat malore gjatë orëve të pasditës do të kenë kalime të lehta të vranësirave, por nuk do të jenë problematike,” tha Hakil Osmani nga MeteoAlb.
E shtuna dhe e diela do të sjellin mot të kthjellët në të gjithë vendin me temperatura që arrijnë mbi 37 gradë Celsius.
“Do të kemi një rritje të lehtë të temperaturave të ajrit në orët e para të mëngjesit, duke bërë që minimumet në qytet e zonës malore të jenë 16 gradë Celsius, ndërsa sa i përket ultësirës perëndimore temperaturat e ajrit në orët e para të mëngjesit do të luhaten nga 18 gradë deri në shumë pranë vlerave 23 gradë Celsius, këto në vijën bregdetare.
Sa i përket orëve të pasdites gjatë fundjavës kemi një rënie të lehtë të temperaturave të ajrit duke bërë që maksimumet në rang territori të jenë deri në 36 apo 37 gradë Celsius. Edhe pse kemi këtë rënie të lehtë të temperaturave të ajrit, duhet të theksojmë që janë temperatura, të cilat regjistrohen të paktën mbi 7 gradë mbi vlerat normale sa duhet të regjistrohen në muajin qershor,” tha Hakil Osmani.
Sipas meteorologëve, era do të jetë prezente sidomos të shtunën, dhe pritet të fryjë e lehtë dhe deri mesatare.
Klan News
