Joana Dudushi, e njohur dhe me emrin “Stela”, u gjet e vrarë në gusht të vitit 2005 në zonën e Plazhit të Vjetër në Vlorë.
Vrasja e 20-vjeçares u lidh me një denoncim që ajo kishte bërë për Policinë e Vlorës, të cilën e akuzonte se bashkëpunonte për të arrestuar njerëz të pafajshëm, të cilët më pas liheshin të lirë kundrejt parave.
Trupi i saj u gjet i groposur në zonën e plazhit. Ajo ishte vrarë me disa goditje me thikë, ndërsa si autor krimi u arrestua tri vite më vonë, Derlin Dervishaj. 32-vjeçari pranoi në atë kohë se ishte autor i vrasjes dhe se me Joanën kishte pasur një histori dashurie. Dervishaj pranoi para prokurorit Petrit Çano, se kishte qenë ai autori i vrasjes duke treguar dhe arsyen që e kishte shtyrë drejt këtij krimi. Në kohën kur ndodhi ngjarja, “Stela” ishte bërë e njohur pasi për llogari të një emisioni investigativ futi në “kurth” disa persona dhe agjentë Policie.
Këta të fundit, në atë kohë, përmes përgjimeve të “Stelës”, akuzoheshin për korrupsion pasi u vinin gjoba qytetarëve përmes presionit. Por, në bazë të dëshmisë së dhënë para hetuesve nga Derlin Dervishajt, krimi i tij nuk kishte lidhje me denoncimin e bërë nga Joana, por ishte një çështje private e tyre.
Në atë kohë 22 vjeç, Dervishaj ka pranuar para Gjykatës se Joana i bënte presion edhe pas përfundimit të lidhjes mes tyre, duke i kërkuar para për foshnjën disa muajsh, me pretendimin se ishte i ati. Por për Derlin Dervishajn kjo ishte e pamundur, pasi lidhja e tyre kishte zgjatur vetëm pak muaj dhe kishte nisur pas ngjizjes së shtatzënisë së saj.
“Kam pasur lidhje intime me Joanën. Me të jam njohur vetëm në muajin nëntor dhe lidhja jonë zgjati 6 muaj. Pas ndarjes, Joana nuk më linte rehat. Unë akuzohesha nga ajo se isha babai i të birit, Helionit, i cili ishte rreth 1 vjeç. Unë insistoja në të kundërtën, pasi nuk kishte asnjë mundësi që të ishte e vërtetë, por ajo më kërkonte para për fëmijën. Një natë më dërgoi mesazh duke më kërcënuar se kishte një letër timen si provë për të më denoncuar. Rreth orës 2 të natës më erdhi një mesazh nga Joana, ku më shante mua dhe të dashurën time. Nuk e ruajtja më qetësinë. Në rrugicën ku edhe e vrava, i thashë të më linte rehat, por ajo më tundte letrën, duke më thënë se do të më denonconte. Nuk e përmbajtja dot veten. Nxora thikën që e mbaja gjithnjë me vete dhe e godita disa herë”, ka rrëfyer i riu nga Vlora. Në përfundim të gjyqit, ai u dënua me gjykim të shkurtuar me 5 vite heqje lirie.
PANORAMA
