Partia Demokratike i është përgjigjur pozitivisht kërkesës së Ramës dhe Metës për tu ulur në bisedime. Ai ka takuar mesditen e sotme krerët e partive të koalicionit të djathtë dhe ka dalë me një deklaratë publike:
“Koalicioni opozitar duke vlerësuar momentin kritik për Shqipërinë dhe shqiptarët për shkak të kërcënimit të zgjedhjeve dhe të votës së lirë dhe të ndershme nga krimi dhe droga me lidhje qeveritare, shpreh gatishmërinë për një tryezë dialogu të vërtetë dhe jo fasadë, me përfaqësuesit e partive të koalicionit qeveritar me qëllim krijimin e kushteve për zgjedhje të lira e të ndershme, përmes një qeverie me mbështetje të gjerë politike që do të garantojë:
1-Zbatimin e plotë të ligjit të dekriminalizimit.
2-Luftë efikase kundër narkotrafikut, krimit të organizuar dhe parave të drogës.
3-Përgatitjen e zgjedhjeve të lira e të ndershme.
4-Zbatimin e reformës në drejtësi, sipas përcaktimeve kushtetuese të 22 korrikut”.
Siç shihet në deklaratë, opozita vë si kusht të takimit ‘qeverinë teknike’.
Tashmë priten modalitetet mbi takimin mes liderve politike në vend për të zgjidhur krizën politike në vend.
