Në emër të Partisë Demokratike, ftesës së Kryeministrit Edi Rama për bashkëpunim në lidhje me situatën pas tërmetit, iu përgjigj Edi Paloka.
Nënkryetari i PD-së në nj status në rrjetet sociale shkruan se ajo që ju duhet shqiptarëve nuk është pasurimi i albumit fotografik propagandistik i Edi Ramës me Lulzim Bashën në një tryezë.
LEXO EDHE- Tërmeti/ Rama kërkon sërish bashkëpunim me Bashën
“Ajo që kanë nevojë shqiptarët është një qeveri e përgjegjshme, një kryeministër që nuk e mbush ditën me shfaqje te shëmtuara me fatkeqët. Shqiptarëve nuk i duhet një kryeministër që shfrytëzon fatkeqësinë për të nxjerrë nga sirtari projektet me PPP korruptive për të pasuruar klientët e tij mbi gërmadhat e vdekjes. Shqiptarët duan ndihmë për njerëzit në nevojë. Shqiptarët meritojnë transparencë dhe përgjegjësi para ligjit për fajtorët”, thekson zoti Paloka.
Sipas tij, nëse Edi Rama kërkon vërtetë që të triumfojë ligji duhet që në burg të përfundojnë ata persona që lejuan banorët të futen në pallatet e Thumanës të çertifikuara të pabanueshme pas tërmetit të 21 shtatorit, nga Artur Bushi te qeveritarët e Tiranës.
Po sipas tij edhe ish kryetari i Bashkisë së Durrësit, Vangjush Dako duhet të përfunojë në burg dhe jo të jetë në krah të Ramës, edhe gjatë vizitës në Turqi.
“Edi Rama nuk mund ta mbulojë dështimin e tij me thirrje hipokrite. Ai duhet të mbajë përgjegjësi për dështimet e njëpasnjëshme që çuan në viktima dhe vuajtje pa fund. Pse emergjencat civile nuk kishin mjetet e duhura për të përballuar fatkeqësinë natyrore? Pse i bëri lekët për paisje emergjencash, gaz helmues për popullin, dhe milionat për qen kërkimi, ushqim për babëzinë e qenveritarëve të korruptuar. Pse nuk i heq 10 oligarkëve të tij 150 milionë dollarë të taksave të shqiptarëve që t’ua kalojë ato njerëzve në nevojë”, thekson Paloka.
Ndër të tjera ai thotë se Lulzim Basha ka ofruar 2 plane për kapërcimin e shpejtë të fatkeqësisë: Planin e Emergjencës për banesat e dëmtuara dhe Planin për Rimëkëmbjen e Biznesit të prekur nga tërmeti./ Opinion.al
