Deputetja e zgjedhur e PD, Grida Duma ka përjashtuar dhe ka mohuar çdo mundësi bashkëqeverisjeje me Partinë Socialiste, ndërsa nuk ka përjashtuar mundësinë e bashkëpunimit, por në pozicionin e opozitës.
Në një intervistë në News 24, Duma tha se PD mund të bashkëpunojë me qeverinë në sektorë të tillë si integrimi, arsimi dhe shëndetësia, por u shpreh se ky vend nuk bëhet demokratik pa një opozitë efiçente. Duma foli edhe për zgjedhje të parakohshme, ndërsa tha se për këtë duhet të presim se si do të sillet SPAK.
Pjesë nga intervista
Por a duhet PD ta vlerësojë shtrirjen e dorës nga Rama për qeverisje për hir të integrimit dhe reformave?
Grida Duma: Diku, diku, unë mund të kem ngritur zërin më shumë seç duhet. Unë e përjashtoj. Nuk mundesh kurrë të bësh aleancë me atë që është kundër shqiptarëve. Nuk mundesh kurrë të bashkërendosh punët me ata persona që kanë bërë punët keq, unë nuk harroj. Memoria e shkurtër e këtij vendi e ka shkatërruar vendin. Ndërkombëtaret duhet të kuptojnë që ky vend nëse nuk ka opozitën eficente nuk bëhet dot demokratik.
Ambasadorja Kim tha që duhet të bashkëpunoni?
Grida Duma: Ka sektorë që do të bashkëpunojmë, integrimin, arsimin dhe shëndetësinë. Në këtë drejtim nuk ka nevojë për të bashkëqeverisur, por për t’u ulur, diskutuar, e dhënë opozitës rolin që i takon. Kur u erdhi momenti për të bërë ndryshimin e Kodit Zgjedhor, ata u mblodhën.
Si është marrëdhënia me LSI dhe sa kompakte është opozita e bashkuar, sidomos tani pas 25 prillit?
Grida Duma: LSI është përpjekur të jetë opozitare dhe kundër Ramës. Qëndrimet që mban për të shkuarën dhe të ardhmen duhet të maturohen në vazhdimësi. PD e vlerësoj shumë për fisnikërinë që ka si forcë politike, kur ka elementë të vegjël e që mund t’i lejohet të thotë ndonjë fjalë, nuk e thotë kurrë.
Ju latë të kuptohet që mund të shkohet në zgjedhje të parakohshme. Kur mund të shkojë vendi në zgjedhje të parakohshme.
Grida Duma: Duhet menjëherë të merren vendime për zgjedhjet lokale. Janë disa bashki që janë me emërime dhe jo me zgjedhje, të tjera me nga një kandidat. Kemi një raport të OSBE që me krijimin e Gjykatës Kushtetuese duhet vlerësuar zgjedhjet e 2019. Kjo është e shpejtë. Ndërsa flasim për nacionalet do të shohim si do të sillet SPAK, përshpejtimi i çështjes edhe në institucionet ndërkombëtare do të përshpejtojmë ditën, pse jo, vendi duhet të vendoset në zgjedhje të parakohshme.
Mund të shkohet në zgjedhje të parakohshme?
Pse jo. Mendoni se ne duhet t’i falim ndokujt ndonjë gjë? Askujt, zero! Kur e keqja përsëritet, ne duhet ta ndalojmë. Patjetër që duhet të ndjekim çdo hap.
Dy janë gjërat kryesore, përdorimi i administratës dhe i fondeve për fatkeqësi. Në Rrogozhinë thuhej se tërmeti nuk ka dëme, por aty ishin 1971 dosje, që nga DS1, kaluan te DS3, DS4, kaluan te milionëshet. Njerëzit merrni telefonata ‘nëse nuk voton për ne, nuk merr gjë’. Nëse nuk kishte blerje, PD do të merrte 75 mandate. Të gjithë mendonin se PD do t’i merrte 75 mandate, nëse s’do të kishte vjedhje.
