Pas ngjarjes së djeshme në ndeshjen Kamza-Laçi ku u dhunua rëndë arbitri kryesor, Sekretari i Federatës Shqiptare të Futbollit Ilir Shulku ka dalë në një konferencë të jashtëzakonshme për mediat. Ai ka thënë se nëse nuk merren masa, mund të ketë edhe bojkot të kampionatit.
“Kërkojmë që policia të marrë përsipër mbarëvajtjen e ndeshjeve, kërkojmë që klubet të organizojnë si duhet ndeshjet dhe kërkojmë që komisionet përkatëse të tregohen sa më të ashpra me këto ngjarje. Policia nuk ka marrë përgjegjësitë që i takojnë për incidente të ndryshme, duke nisur nga ndeshja Skënderbeu-Tirana në fillim të sezonit. Asnjë masë, asnjë dënim, as në ndeshjet ku ka pasur probleme, si në Kamzë ku u godit me gur anësori, apo në Tiranë ku u sulmua zyrtari i Flamurtarit”, ka thënë Sekretari i Përgjithshëm i FSHF-së Ilir Shulku.
Ai ka qenë i ashpër, duke bërë pyetjen nëse institucioneve shtetërore i intereson të vazhdojë futbolli në këtë vend apo jo, pasi kështu nuk vazhdohet.
“Shteti shqiptar u ka ngarkuar klubeve edhe barrën e pagesës së forcave të sigurisë private. Bëhet show nga policia si në derbi, ku vetëm në fund të ndeshjes u futen forcat speciale. Tani lind pyetja: A është i interesuara shteti shqiptar të vijojë futbolli në këtë vend, sepse kështu nuk mund të vazhdohet”, ka thënë Shulku.
Ndërkohë, Tahir Kastrati, Shef i Shoqatës së Arbitrave ka thënë se jeta e gjyqtarëve të ndeshjeve të futbollit është në rrezik.
“Jeta e gjyqtarëve është në rrezik dhe kjo është më e rënda. Ne si shoqatë kërkojmë me forcë që të ndalet dhuna në stadiume, që vjen si rrjedhojë e mosveprimit të policisë së shtetit”, është shprehur ai./Opinion.al
