Shqipëria vazhdon përgatitjet për të pritur turneun final të Kampionatit Europian U-17 2025.
Ky event madhor i është besuar për herë të parë FSHF-së dhe do të zhvillohet nga 19 Maji deri më 1 Qershor.
Shqipëria, Italia, Franca, Gjermania, Çekia, Portugalia, Belgjika dhe Anglia janë 8 ekipet finaliste që do të zbresin në fushë në katër stadiumet shqiptare: “Arena Kombëtare”, “Niko Dovana”, “Arena Egnatia” dhe “Elbasan Arena”.
Në kuadër të fushatës promovuese për këtë event historik, FSHF organizoi një aktivitet në shkollën “Emin Duraku” në Tiranë.
Nxënësit u njohën me rëndësinë që ka ky turne për vendin tonë dhe futbollin shqiptar.
Të pranishëm ishin anëtari i Komitetit Ekzekutiv të FSHF-së, Pano Xhixho si edhe ambasadori i turneut, Klaus Gjasula, të cilët ftuan nxënësit të mbështesin Shqipërinë nga shkallët e stadiumeve.
Xhixho tha se prezenca e tifozëve në stadium është shumë e rëndësishme për kombëtaren kuqezi.
“Na duhet shumë prezenca juaj në shkallët e stadiumit sepse për herë të parë Shqipëria merr pjesë në një kampionat europian. Do ta ketë shumë të vështirë po jam i bindur që me prezencën tuaj dhe me prezencën e të gjithëve ne, do ta kemi më të thjeshtë”, tha Pano Xhixho.
Ish-futbollisti i Kombëtares shqiptare, Klaus Gjasula theksoi se ky kampionat është shumë i rëndësishëm për Shqipërinë.
“Ju e dini sa i rëndësishëm është ky kampionat për ne. Do të mbështesim çunat tanë, që t’i tregojmë botës se kush jemi ne shqiptarët, talentin, krenarinë dhe fuqinë tonë. T’i tregojmë botës që ne do të mbështesim njëri-tjetrin. Duhet të punojmë bashkë, të kemi besim dhe uroj të vini të gjithë në stadium”, Klaus Gjasula.
Objektivi i federatës është që të vijojë me aktivitete të tjera promovuese dhe informuese në shkolla të tjera të katër qyteteve pritëse të eventit, Tiranë, Rrogozhinë, Durrës e Elbasan.
Klan News
