Për herë të parë pas shumë vitesh, prokuroria ka kërkuar dënimin maksimal, burgim të përjetshëm, për një grua.
Bëhet fjalë për ngjarjen e vitit 2018 në Vlorë ku humbën jetën Selkie dhe Olsi Hoxhallari.
Pas dy vitesh hetime, Prokuroria ka mbyllur dosjen hetimore, duke kërkuar dënimin me burgim të përjetshëm për Hysnie Hoxhallarin dhe Kasem Pirjasin.
Trupat e dy viktimave u gjendën të djegur brenda një dhome në shtëpi. Fillimisht u duk se ata kishin mbetur viktimë e një aksidenti por kur policia zbuloi një mesazh Hysnie Hoxhallarit drejtuar Kasem Pirjasit, hetimet morën një tjetër rrjedhë.
“Ç’më bëre, më more në qafë,”- i ka shkruar Hysnia, Kasemit
Kasem Pirjasi, 26 vjeçar, goditi me sëpatë Olsi Hoxhallarin dhe mbyti nënën e tij dhe më pas në bashkëpunim me Hysnien i vunë zjarrin dhomës për të humbur gjurmët.
Ata të dy u zbulua se ishin në një lidhje jashtëmartesore me njëri-tjetrin.
Gruaja deklaroi gjatë seancës ku u njoh me masën e sigurisë se ishte penduar shumë, ndërsa i hodhi fajin për krimin e rëndë të dashurit të saj.
“Ndjehem e penduar se nuk kam kallëzuar krimin, por isha e kërcënuar dhe i druhesha opinionit publik për gjithçka kishte ndodhur. Kasëmi erdhi dhe më tha se mbaroi gjithçka, mbasi kishte vrarë dhe vënë flakën banesës. Më kërcënoi se, nëse do të tregoja, do të më vriste mua dhe fëmijën. Por ndjehem e penduar, që fsheha armën e krimit dhe nuk kallëzova për ngjarjen e rëndë”, ka deklaruar gjatë seancës Hysnie Hoxhallari./ Opinion.al
