Gjyqtari i Gjykatës së Lartë, Admir Thanza do të ketë një provë të vështirë sot përballë Komisionit të Pavarur të Kualifikimit, aty ku varet edhe karriera e tij në drejtësi.
Gjyqtari sikurse mësohet ka fshehur një dënim të formës së prerë në Itali, ku ishte dënuar me 40 ditë burg në vitin 1999 dhe 100 mijë lireta gjobë për pjesëmarrje në vjedhje.
Vetë gjyqtari, gjatë përballjes së parë me Komisionin e Pavarur të Kualifikimit, nuk e ka pranuar konsumimin e veprës penale, duke thënë se e kishte marrë përsipër veprimin e ish-kunatës së tij për të shpëtuar jetën e nipit, që kurohej në Itali nga sëmundje e rëndë.
Ndërkohë Prokuroria e Përgjithshme pothuajse ka përfunduar të gjitha verifikimet për gjyqtarin e Gjykatës së Lartë, Admir Thanza, dhe e ka referuar dosjen e tij në Prokurorinë e Tiranës, organ i cili ka nisur procedim penal ndaj gjyqtarit.
Hetimi për gjyqtarin Thanza ka nisur pasi nuk e ka deklaruar dënimin në formularin e dekriminalizimit çka përbën vepër penale sipas ligjeve në fuqi.
