Përgjatë dëgjesës me Ministrin e Brendshëm Sandër Lleshaj, Komisioni i Medias dhe Edukimit u përplas me ministrin për rastin e përdhunimit të së miturës në Kavajë. Edhe pse dëgjesa u zhvillua mbi çështjen e studentëve, për të cilët opozita deklaron se janë dhunuar nga policia, nuk munguan debatet për ngjarjen e rëndë.
Kryetarja e Komisionit Albana Vokshi akuzoi ministrin Lleshaj për fshehjen e ngjarjes, i cili deklaroi se rasti ishte referuar në Prokurori dhe djemtë ishin ndaluar para denoncimit publik të Berishës.
Lleshaj përsëriti disa herë që krimi nuk ishte fshehur, dhe rasti ishte referuar në Prokurori, por Vokshi insistonte të dinte se pse nuk kishte një komunikatë zyrtare lidhur me ngjarjen.
Vokshi: Ministri i Brendshëm e pranoi vetë që ngjarja kishte ndodhur, nuk kishin informuar sepse e quajti publicitet pavarësisht se ishte krim monstruoz. E pranoi vetë që kishte fshehur krimin. Se me çfarë tagri përcakton ministri se është publicitet apo jo?! E pranoi vetë se kishin fshehur ngjarjen.
Lleshaj: Personat në fjalë janë ndaluar nga policia e Shtetit para se shefi juaj ta bënte publike.
Vokshi: A është fshehur ngjarja
Lleshaj: Jo.
Vokshi: Pse nuk e keni në komunikatë?
Lleshaj: Është referuar në prokurori.
Vokshi: Jo, në komunikatë zyrtare./E.M
