Kryeministri Edi Rama, ka reaguar ashpër ndaj një ndërtimi pa leje në zonën e Thethit, çështje për të cilën foli edhe gjatë mesditës së sotme, 7 korrik, ku theksoi se një ndërtim në zemër të Thethit, edhe pse është referuar në Prokurori nga organet përkatëse, si shkelje, nuk është ndërmarrë asnjë veprim.
Rama në një video në rrjetet sociale, ka publikuar pamjet nga shembja e ndërtimeve në atë që është quajtur “Fshati turistik në mes të Thethit”.
Kryeministri, tregon punën që sipas tij po bëhet për rikthimin e qendrës së qytezës magjike në gjendjen e mëparshme.
“Ja shikojeni vetë LIVE nga Thethi, Kjo është fusha e mrekullueshme e Thethit, ku një kriminel që as nuk ka kurajon të shfaqet ndërkohë që IKMT po zbaton ligjin ka hedhur betonin e dynjasë për të ndërtuar “fshatin e tij turistik” pa asnjë leje, një krim i shumëfishtë për të cilën një prokurore e quajtur ELSA GJELI, ka refuzuar të hapë çështjen duke hedhur në kosh denoncimin e Policisë së Shtetit. Tani çfarë borxhi i kanë zonjës GJELI, Republika e Shqipërisë, Parku Kombëtar i Thethit, banorët e mrekullueshëm e punëtorë të Thethit, vizitorët e turistët e shumtë dhe gjithë këto forca që kanë zbarkuar sot në Theth, bashkë me taksapaguesit shqiptarë që do të paguajnë tërë këto shpenzime për paga e për karburant, për pastrimin e kësaj katrahure dhe kthimin e qendrës së qytezës magjike në gjendjen e mëparshme?!”, shkruan Rama.
Ndërkohë në një dalje live paradite, teksa bëri të ditur çështjen, theksoi se rastin do e çojë deri në Këshillin e Lartë të Prokurorisë (KLP), dhe se do të merren masa për çdo prokuror në Republikën e Shqipërisë që merr vendime të tilla në përgjigje të krimeve mjedisore.
“Është e pabesueshme, deri në kufijtë e të llahtarshmes, që një prokurore që para trajtimit të një krimi mjedisor, ndaj pronës publike, të një krimi ndaj një zone ligjërisht të mbrojtur, të jetë në një jerm si ai që lexova që është pjesëz e një përroi psikik të pashtershëm në formë vendimi për mosfillim të çështjes penale”, deklaroi Rama.
