Transferimi i Valdet Ramës në Turqi ka ndeshur në një pengesë shumë të madhe, gruan e tij. Futbollisti është gati të firmosë një kontratë dyvjeçare me një klub turk, por bashkëshortja i ka krijuar pengesa, pasi i frikësohet sulmeve të mundshme terroriste.
Sipas mediave turke, Rama gjendet prej dy ditësh në Turqi ku është takuar me drejtuesit e Balikesirspor. Palët kanë rënë dakord për anën ekonomike të marrëveshjes dhe futbollisti dukej gati për të hedhur firmën e tij në kontratën dyvjeçare që i ka ofruar klubi.
Por në fund, Rama ka vendosur që të shtyjë firmën në kontratë, i penguar për ta bërë një gjë të tillë nga bashkëshortja e tij, e cila nuk dëshiron të jetojë në një vend ku ekziston rreziku konkret i sulmeve terroriste.
Futbollisti ka kërkuar pak kohë të mendohet dhe klubi i Ligës së Parë turke është i gatshëm ta presë, i bindur se afrimi i mesfushorit mund ta ndihmojë për t’u ngjitur në elitën e futbollit turk.
