Frederik Veseli është konsideruar si futbollisti fal gabimit të të cili Shqipëria humbi ndeshjen kundër Francës, ndërkohë që tani ai ka thënë se është gati për të ndihmuar Kombëtaren në ndeshjet kualifikuese për Kupën e Botës.
Mbrojtësi i Kombëtares shqiptare, Frederik Veseli insiston se ai ka dhënë çdo herë maksimumin kur ka luajtur dhe për këtë shpreson se të ketë bindur trajnerin Gianni de Biasi se meriton të luaj.
Ai po ashtu foli edhe për ndeshjen me Izraelin, ku shpreson se do të marrin rezultat pozitiv.
“Shpresoj që tani ti kem bindur të dy trajnerët, si atë te Empoli, ashtu edhe De Biasin. E kam ndihmuar skuadrën time për aq sa kam qenë në fushë. Me Izraelin do të kërkojmë fitoren përballë një rivali direkt, që ka po aq pikë sa ne. Me një sukses mund të ngjitemi edhe në vendin e dytë, gjithmonë nëse Italia bën një hap fals. Pak rëndësi ka nëse unë luaj apo jo me Kombëtaren, e rëndësishme është suksesi i ekipit”, tha Veseli për Supersport.
Kujtojmë se ndeshja kundër Izraelit luhet me 12 nëntor dhe zhvillohet në kuadër të kualifikimeve për Kupën e Botës.
