Frederik Veseli, menjëherë pas zyrtarizimit të tij si futbollisti më i ri i skuadrës së Empolit, ka marrë pjesë në stërvitjen me skuadrën e Serisë A. Mbrojtësi i kombëtares shqiptare ka zhvilluar dje seancën e tij të parë stërvitore me klubin e ri dhe sipas mediave italiane, ka lënë përshtypje të mira.
Portali “pianetaempoli.it” ka bërë të ditur se lojtari ka bërë një paraqitje mëse pozitive gjatë seancës stërvitore, duke tërhequr vëmendjen e stafit teknik të skuadrës, ndonëse ai nuk kishte zhvilluar një fazë të mirëfilltë stërvitore, i larguar nga Lugano prej më shumë se dy javësh.
Drejtuesit e Empolit kishin planifikuar që të kalonin lojtarin menjëherë në huazim drejt një klubi tjetër për këtë sezon, por nëse Veseli do të paraqitet pozitivisht, nuk është çudi që të mbetet pjesë e skuadrës që në këtë edicion futbollistik.
Mbrojtësi shqiptar firmosi dje kontratën e tij me klubin deri në vitin 2018, ndërsa ka një opsion për zgjatjen e saj deri në qershorin e vitit 2020.
