Franca po përgatitet për një ditë tjetër protestash dhe grevash për të kundërshtuar reformën e pensioneve të presidentit Emmanuel Macron.
Sindikatat shpresojnë se do të ketë një pjesëmarrje masive në ditën e 11-të të protestave, të mbajtura që nga muaji janar.
Të gjitha protestuesit janë në pritje të verdiktit që do të jepet më 14 prill nga Këshilli Kushtetues i Francës, i cili ka fuqinë të anulojë një pjesë ose edhe të gjithë projektligjin.
Macron, i cili aktualisht ndodhet jashtë vendit për një vizitë në Kinë, është duke u përballur me sfidën më të madhe të mandatit të tij të dytë lidhur me rishikimin e pensioneve kryesore, që përfshijnë rritjen e moshës minimale të pensionit nga 62 në 64 vjeç.
Protestat u shndërruan në trazira të dhunshme pasi kryeministrja Elisabeth Borne më 16 mars vendosi të kalojë projektligjin në Parlament pa votim. Sindikatat thanë se në një takim me Borne të mërkurën nuk pati asnjë rishikim, pasi ajo refuzoi të diskutonte për rritjen e moshës minimale të pensionit në 64 vjeç.
“Është qartazi një dështim kur kryeministrja nuk po lejon as një rrugë për diskutim,” tha Cyril Chabanier, duke folur në emër të tetë sindikatave kryesore të vendit pas një orë bisedimesh.
Ndërkohë krerët e sindikatave u kanë bërë thirrje francezëve që të protestojnë të enjten.
Sophie Binet, drejtuesja e re e sindikatës, bëri thirrje për më shumë protesta dhe greva.
“Duhet të vazhdojmë mobilizimin deri në fund, derisa qeveria të kuptojë se nuk ka rrugëdalje tjetër përveç tërheqjes së kësaj reforme”, tha ajo.
Qeveria ka argumentuar se ndryshimet janë të nevojshme për të parandaluar që sistemi i pensioneve të zhytet në deficit. Në pjesën tjetër të Evropës, njerëzit kryesisht dalin në pension në fund të të 60-ave pasi jetëgjatësia është rritur.
Kujtojmë se një numër rekord njerëzish, më shumë se 1.2 milionë, marshuan kundër reformës në mbarë vendin më 7 mars./Opinion.al
