Pas dy javësh protestash e demonstratash mbarëkombëtare, që i vunë “flakën” Parisit dhe nuk kursyen as vendet më të frekuentuara nga turistët, si “Harku i Triumfit” apo bulevardi “Champs Elysees”, kryeministri francez Edouard Philippe pezulloi rritjen e taksës së naftës. Nga protestat e zhvilluara 3 persona kanë humbur jetën. Mbi mbi 260 persona janë arrestuar. Ndërsa 100 të tjerë kanë mbetur të plagosur.
Rritja e taksës, që çon në rritjen e çmimit për konsumatorët e që ishte planifikuar të hynte në fuqi nga 1 janari, solli pakënaqësinë e shtuar të të ashtuquajturve “jelekë të verdhë”. Më pas demonstratat morën natyrë antiqeveritare. Duke u fokusuar kryesisht kundër politikave të presidentit Emmanuel Macron. Macron akuzohet që po ndjek politika kundër shtëpiakëve apo qytetarëve me të ardhura të ulëta.
Edhe pse nisën fillimisht paqësore, demonstratat degjeneruan në përplasje të dhunshme në rrugë mes protestuesve dhe policisë. Por edhe në vandalizimin e Parisit gjatë fundjavës.
Macron e ka marrë vendimin për të pezulluar rritjen e taksës së naftës më 1 janar që prej së hënës, thanë burime të AFP-së. Pasi qeveria e tij kaloi shumicën e ditës duke u takuar me krerët e të gjitha partive politike në Francë.
